Kadib markii cilad farsamo ay ku timid diyaarad uu la socday Guddoomiyaha Baarlamaanka Hirshabelle & tiro Xildhibaano ah, kuwaasi oo ka ambabaxay Jowhar, kuna sii jeeday Magaalada Beledweyne ee Gobolka Hiiraan, ayaa Wasiirka Amniga Hirshabelle wuxuu faah faahin ka bixiyay arrintaasi.
Maxamed Khayre Wasiirka Amniga Hirshabelle ayaa qoraal uu soo dhigay Boggiisa xiriirka Bulshada wuxuu ku sheegay diyaarad nooceeda uu yahay Fokker 50(50Qaad) oo ay leedahay shirkada SOM EXPRESS inay ka raaceen Jowhar, kuna sii jeedeen Magaalada Beledweyne.
Waxa uu sheegay Diyaarad oo 10 daqiiqo u jirta Magaalada Beledweyne cilad inay ku timid mid ka mid Matoorada Diyaarada, islamarkaana uu damay hal mator, iyadoo duuliyihii diyaarada go,aan uu ku qaatay inuu ka dajiyo dadkii saarnaa diyaarada Magaalada Muqdisho.
“Waxaan kamid ahaa wafdi uu hogaaminayay Guddomiyaha Baarlamaanka Hirshaballe Mudane Abdihakim Luqmaan oo ka kooban wasiiro, Xildhibano, Saraakiil iyo howlwadeenada Barlamaanka Hirshabelle, Garoonka Casimada dowlad goboledka Hirshabelle ee jowhar ayaan ka raacnay diyarada nuuceda tahay Fokker 50(50Qaad) oo eey lee dahay shirkada SOM EXPRESS waxeyna aheeyd inay nageyso magalada Baladweyne oo uu ahaa ujeedka safarkena inaan halkaas tagno, Xili aan ku dhaween Magaalada Baladweyne qiyaastiina aan ujirno wax ka yar 10daqiiqo ayaa waxaa naga damay matoor ka mid ah 2dii Matoor ay diyaarada ku shaqeynaysay sida kaaga muuqato muuqaalka hoose, markii ay ciladaas dhacday waxaan filaynay in halka matoorka ee inoo shaqeenayo aan ku tagi karno Baladweyne maadaama ay aad inooga dhaweed laakiin nasiib daro duuliyihii diyaarada ayaa ku adkeestay inuu naga dajiyo garoonka Magaalada Muqdisho oo qiyaastii safar ahaan qaadaneyo inaan tagno 50daqiiqo, nasiib wanaag ilaahey wuu nagu nabad keenay halkii matoor muqdisho Alxamdulilah.” Ayuu Bartiisa xiriirka Bulshada ku soo qoray Wasiirka Amniga Hirshabelle.
Xubnaha Wafdigan ayaa hadda waxa ay ku sugan yihiin Magaalada Muqdisho, balse ujeedka safarkooda ayaa ahaa Magaalada Beledweyne.
Nagala soo xiriir dhacdo@gmail.com
